عامر خان کو میکسیکن باکسرکنیلو الواریز کے ہاتھوں ناک آؤٹ شکست

کنیلوالواریز نے مجموعی طور پر 47 مقابلوں میں 33 بار حریفوں کو ناک کیا:فوٹو: رائٹرز

لاس ویگاس: میکسیکن باکسر کانیلو الواریز نے پاکستانی نژاد برطانوی باکسرعامرخان کو ڈبلیو بی سی مڈل ویٹ ٹائٹل کے میچ میں ناک آؤٹ شکست دے دی۔
امریکی شہرلاس ویگاس کے باکسنگ ارینا میں ہونے والے مقابلے میں کانیلو الواریز نے پاکستانی نژاد برطانوی باکسرعامر خان کو ڈبلیو بی سی مڈل ویٹ کے چھٹے راؤنڈ میں ناک آؤٹ کر کے ٹائٹل اپنے نام کر دیا۔ چھٹے راؤنڈ میں کانیلوالواریز نے جب ایک زوردار مکہ مار کر عامرخان کو رنگ میں گرا دیا اور ریفری نے مقابلہ ختم کرنے کا اعلان کرتے ہوئے میکسیکن باکسر کو کامیاب قرار دے دیا۔
شکست کے بعد عامر خان کا کہنا تھا کہ چیمپین بننے کا عزم لے کر رنگ میں اترا تھا لیکن قسمت نے ساتھ نہ دیا۔ الواریز نے بہت زبردست مقابلہ لڑا اور جیت گیا۔ دوسری جانب کانیلو الواریز کا کہنا تھا کہ مجھے خوشی ہوتی ہے کہ اپنے حریف باکسر کو مقابلہ ختم ہونے سے پہلے ہی ناک آؤٹ کرکے شائقین کو حیران کردوں اور آج بھی میں نے ایسا ہی کیا۔
واضح رہے کہ کنیلوالواریز نے مجموعی طور پر 47 مقابلوں میں 33 بار حریفوں کو ناک کیا جب کہ  کنیلوالواریز کو 47 مقابلوں میں صرف ایک مرتبہ شکست کا سامنا کرنا پڑا۔

اب بغیر پاس ورڈ کے حامل وائی فائی کنکشن کو بآسانی تلاش کریں

’’ایواسٹ وائی فائی فائنڈر‘‘ بغیر پاسورڈ والے وائی فائی کنکشن تلاش کرتی ہے جبکہ یہ ایپ بغیر انٹرنیٹ کے بھی چلتی ہے۔ فوٹو؛ فائل

جب تھری جی ڈیٹا پیک کی معیاد ختم ہو جائے یا فون میں کریڈٹ موجود نہ ہو تو انٹرنیٹ استعمال کرنے کے لیے ہم فوراً کسی مفت وائی فائی ہاٹ اسپاٹ کی تلاش شروع کر دیتے ہیں مگر آپ کے قریب میں کس جگہ مفت انٹرنیٹ دستیاب ہو سکتا ہے یہ جاننا تھوڑا مشکل ہے کیونکہ فون لے کر اِدھر اُدھر گھومنا کوئی آسان کام نہیں لیکن اب اس مسئلے کا حل بھی تلاش کرلیا گیا ہے۔
اس مسئلے کا بہترین حل ایواسٹ وائی فائی فائنڈر کی صورت میں موجود ہے۔ یہ ایپلی کیشن بالکل منفرد انداز میں کام کرتی ہے۔ سب سے پہلے تو یہ آپ کے مقام کا جائزہ لیتی ہے اس کے بعد یہ اپنے ڈیٹا بیس سے رابطہ کر کے آپ کے علاقے میں بغیر پاس ورڈ کے دستیاب وائی فائی کنکشنز کے بارے میں پتا کرتی ہے۔ دراصل اس ایپلی کیشن میں دنیا بھر کے مفت وائی فائی کنکشنز چاہے وہ کسی ہوٹل میں ہو یا کسی دوسرے عوامی مقام پر کو ایک جگہ جمع کیا جا رہا ہے۔ تاکہ آپ جہاں بھی ہوں یہ آپ کے علاقے میں مفت دستیاب وائی فائی کنکشن کی نشاندہی کر سکے۔ اس کے علاوہ یہ آپ کے موجودہ مقام کو شناخت کرنے کے لیے جی پی ایس سیٹلائٹس کو استعمال کرتی ہے یعنی اگر آپ کے پاس انٹرنیٹ نہ بھی چل رہا ہو تو یہ ایپلی کیشن کام کر سکتی ہے۔
اگر آپ بغیر پاس ورڈ کے وائی فائی کنکشنز کو تلاش کرنے کی زحمت بھی نہیں کرنا چاہتے تو اس میں ایزی کنیکٹ کا آپشن بھی دستیاب ہے جو ہر وقت بغیر پاس ورڈ کے وائی فائی کنکشنز کی تلاش میں رہتا ہے اور جیسے ہی کوئی نیٹ ورک دستیاب ہو خود بخود اس سے جڑ جاتا ہے۔
اچانک کہیں آپ کے فون میں کریڈٹ ختم ہو جائے یا پھر نیٹ ورک ہی نہ آرہا ہو تو ایسی صورت میں یہ ایپلی کیشن آپ کو آن لائن آنے میں بھرپور مدد دے سکتی ہے۔ اینڈروئیڈ اور آئی او ایس دونوں صارفین کے لیے  ایپلی کیشن مفت دستیاب ہے۔

بھارتی اداکارہ ملیکا شراوت نے فرانسیسی بزنس مین سے شادی کرلی

بالی ووڈ ادکارہ کی یہ دوسری شادی ہے جس کی تقریب فرانس میں ہوئی۔

ممبئی: بالی ووڈ میں اپنے بے باک مناظر کی عکس بندی کے حوالے سے مشہور اداکارہ ملیکا شراوت نے اپنے قریبی دوست اور فرانسیسی بزنس مین سائرل آکزین فینس سے دوسری شادی کرلی۔
بھارتی فلم نگری میں رواں سال بڑے بڑے اداکار شادی کے بندھن میں بندھے ہیں جس کے باعث بڑی عمر کی اداکاراؤں کی شادی کا سیزن کہا جارہا ہے جب کہ اداکارہ پریتی زنٹا کے بعد ایک اور اداکارہ نے غیر ملکی سے شادی کرلی ہے۔
میڈیا رپورٹس کے مطابق بالی ووڈ اداکارہ ملیکا شراوت نے اپنی قریبی دوست اور فرانسیسی بزنس ٹائیکون سائل آکزین فینس سے طویل معاشقے کے بعد شادی کرلی ہے جس کے بعد یہ اداکارہ کی دوسری شادی ہے۔ رپورٹس کے مطابق ملیکا شراوت کی شادی کی تقریب فرانس میں ہوئی جس میں ان کے قریبی دوست احباب نے شرکت کی۔
دوسری جانب اداکارہ کے والد نے بھی شادی کی خبروں کی تصدیق کرتے ہوئے کہا کہ بیٹی کی شادی کی بڑی تقریب جلد ہی ممبئی میں منعقد کی جائے گی۔
واضح رہے کہ اداکارہ ملیکا شراوت نے فلم نگری میں قدم رکھنے سے پہلے بھی شادی کی تھی جو کامیاب نہیں ہوسکی تھی۔

سپریم کورٹ کی عمارت میں آگ لگنے سے 2 کمرے مکمل طور پر جل گئے

سپریم کورٹ بار میں آگ لگنے کے واقعہ کی ذمہ داری چوہوں پر ڈال دی گئی۔ فوٹو: فائل

 اسلام آباد: سپریم کورٹ کی عمارت میں آگ لگنے کے باعث 2 کمرے اور ان میں رکھا فرنیچر مکمل طور پر جل گیا۔
ایکسپریس نیوز کے مطابق سپریم کورٹ کی عمارت میں آج صبح اچانک لگنے والی آگ نے دیکھتے ہی دیکھتے 2 کمروں کو اپنی لپیٹ میں لے لیا جس کے باعث کمروں میں رکھا تمام فرنیچر اور دیگر سامان مکمل طور پر جل گیا۔ سپریم کورٹ کے سیکیورٹی حکام کا کہنا ہے کہ خوش قسمتی سے سپریم کورٹ کا تمام ریکارڈ محفوظ رہا کیونکہ آگ سپریم کورٹ بار کے کانفرنس روم اور لائبریری کے سامنے والے کمرے میں لگی ۔
فائر بریگیڈ کے عملے نے موقع پر پہنچ کر آگ پر قابوپالیا جب کہ سپریم کورٹ کے عملے کا کہنا ہے کہ  آگ کی وجہ شارٹ سرکٹ معلوم ہوتی ہے۔
تحقیقات کے بعد سپریم کورٹ بار میں آگ لگنے کے واقعہ کی ذمہ داری چوہوں پر ڈال دی گئی جب کہ چوہوں کو پکڑنے کے لئے پاکستان ورکرز ڈپارٹمنٹ کا عملہ بھی طلب کر لیا گیا۔ اس کے علاوہ چوہوں کو پکڑنے کے لئے چوہے دان بھی منگوا لئے گئے۔

قائد ایم کیوایم کو ہائی ڈوز نہیں دینا چاہتا ابھی کم ڈوز سے کام چلا رہا ہوں، مصطفیٰ کمال

قائد ایم کیوایم اور ان کے رفقا 22 سال سے بھارتی خفیہ ایجنسی را سے فنڈ لے رہے ہیں، مصطفیٰ کمال فوٹو: فائل

سکھر: پاک سرزمین پارٹی کے رہنما مصطفیٰ کمال کا کہنا ہے کہ میں قائد ایم کیوایم  کو ہائی ڈوز نہیں دینا چاہتا ابھی کم ڈوز سے کام چلا رہا ہوں جس دن ہائی ڈوز دی وہ پریشان ہوجائیں گے۔ 
سکھرمیں میڈیا سے بات کرتے ہوئے پاک سرزمین پارٹی کے رہنما مصطفیٰ کمال کا کہنا تھا کہ  قائد ایم کیو ایم کی رفاقت میں طویل  وقت گزرا مجھے اندر اور باہر کی سب خبر ہے، قائد ایم کیوایم اور ان کے رفقا 22 سال سے بھارتی خفیہ ایجنسی را سے فنڈ لے رہے ہیں اور بہت جلد ان 8 افراد کے نام بھی لینے والا ہوں جوپردہ نشین ہیں۔ انہوں نے کہا کہ میں الطاف حسین کو ہائی ڈوز نہیں دینا چاہتا ابھی  کم ڈوز سے کام چلا رہا ہوں جس دن ہائی ڈوز دی وہ پریشان ہوجائیں گے۔
مصطفیٰ کمال نے کہا کہ گزشتہ روز ہمارے قافلے پر پتھراؤ کیا گیا لیکن ہم نے کسی کے خلاف  مقدمہ درج نہیں کرایا، اپنے ساتھیوں سے کہا ہے کہ ہمیں ان لوگوں سے  لڑائی نہیں لڑنی اور جو لوگ گمراہ ہیں ان سے ہمدردی ہے، ہمیں ان ہی لوگوں کی اصلاح کرنی ہے۔ ان کا کہنا تھا کہ وہ کراچی ، حیدرآباد اور سکھر کے عوام سے گزارش کرتے ہیں کہ اپنی ماں بہنوں اور بچوں کی جانب دیکھو ان کے بچے غائب ہوئے لاشیں اٹھائی گئیں لیکن اتنی جانوں کے نذرانے کے بعد حاصل کیا ہوا۔

بلوچستان پبلک سروس کمیشن کے سابق چیئرمین اشرف مگسی گرفتار

اشرف مگسی پر اختیارات کا ناجائز استعمال اور کروڑوں روپے بٹورنے کا الزام ہے، ذرائع۔ فوٹو:فائل

کوئٹہ: قومی احتساب بیورو (نیب) نے اختیارات کے ناجائز استعمال پر بلوچستان پبلک سروس کمیشن کے سابق چیئرمین اشرف مگسی کو گرفتار کرلیا۔
ایکسپریس نیوز کے مطابق سابق سیکرٹری خزانہ بلوچستان مشتاق رئیسانی کے گھر سے کروڑوں روپے برآمد کئے جانے کے بعد نیب نے صوبے بھر میں کارروائیاں تیز کردیں اور آج بلوچستان پبلک سروس کمیشن کے سابق چیئرمین کو اختیارات کے ناجائز استعمال اور کروڑوں روپے بٹورنے کے الزام میں حراست میں لے لیا۔
نیب ذرائع کے مطابق اشرف مگسی کو مختلف تعیناتیوں میں بے قاعدگیوں کے کیس میں گرفتار کیا گیا جب کہ انہوں نے من پسند افراد کو محکمے میں بھرتی کیا۔
واضح رہے کہ بلوچستان ہائیکورٹ نے غیرقانونی بھرتیوں کے جرم میں اشرف مگسی کو عہدے سے فارغ کرنے کے احکامات جاری کئے تھے جس پر گورنربلوچستان محمد خان اچکزئی نے انہیں 13 نومبر 2014 کو عہدے سے برطرف کردیا تھا۔

جماعت اسلامی کا پاناما لیکس پر کراچی سے خیبرتک ٹرین مارچ کا اعلان

پاناما لیکس والوں کے لئے اڈیالہ جیل میں جگہ کم پڑ جائے گی، امیر جماعت اسلامی فوٹو:فائل

 اسلام آباد: جماعت اسلامی نے پاناما لیکس کے معاملے پر کراچی سے خیبر تک ٹرین مارچ کا اعلان کیا ہے جب کہ سراج الحق کا کہنا ہے پاناما لیکس والوں کے لئے اڈیالہ جیل میں جگہ کم پڑ جائے گی۔
امیر جماعت اسلامی سراج الحق کی زیرصدارت مرکزی رہنماؤں کا اجلاس ہوا جس میں فیصلہ کیا گیا کہ پاناما پیپرز میں پاکستانی سیاسی اور کاروباری شخصیات کے نام سامنے آنے کے خلاف کراچی سے خیبر تک رواں ماہ کے آخری ہفتے میں ٹرین مارچ شروع کیا جائے گا۔ ذرائع کے مطابق اجلاس میں فیصلہ کیا گیا کہ ٹرین مارچ میں شرکت کے لئے دیگر سیاسی جماعتوں کو بھی دعوت دی جائے گی اور مارچ کے دوران تمام چھوٹے بڑے اسٹیشنز پر عوامی اجتماعات ہوں گے جس میں عوام کو متحرک کیا جائے گا۔
ذرائع کا کہنا ہے کہ ٹرین مارچ جماعت اسلامی کی ’’کرپشن فری پاکستان‘‘ مہم کا حصہ ہے جس کی قیادت امیر جماعت اسلامی سراج الحق خود کریں گے۔
دوسری جانب اسلام آباد میں تقریب سے خطاب کرتے ہوئے امیرجماعت اسلامی سراج الحق کا کہنا تھا کہ پاناما لیکس نے سب کچھ کھول کررکھ دیا اورایوانوں میں بیٹھے لوگ آئندہ چند دنوں میں جیلوں میں ہوں گے۔ ان کا کہنا تھا کہ پاناما لیکس والوں کے لئے اڈیالہ جیل میں جگہ کم پڑ جائے گی جس کے لئے بلوچستان اور سندھ کی جیلوں کو بھی رنگ و روغن کر لیا جائے۔