لاہور: کوٹ لکھ پت میں محبت میں ناکامی پر نوجوان نے مبینہ طورپر فائرنگ سے لڑکی کی بہن کو زخمی کرنے کے بعد اپنی زندگی کا بھی خاتمہ کرلیا۔
ایکسپریس نیوزکے مطابق لاہورکے جنرل اسپتال میں ایک نوجوان کی لاش جب کہ ایک لڑکی کو زخمی حالت میں لایا گیا، دونوں کو گولیاں لگی تھیں۔ مرنے والے نوجوان کی شناخت اشفاق جب کہ زخمی لڑکی کی شناخت ندا کے نام سے ہوئی۔
زخمی لڑکی نے پولیس کو بیان دیا ہے کہ وہ کوٹ لکھ پت کے علاقے اسماعیل نگر کی رہائشی ہے، اشفاق اس کی بہن مہوش سے محبت کرتا تھا۔ ہفتے کی صبح وہ اچانک گھر میں گھس آیا اور اس نے مہوش پر فائرنگ کردی تاہم مہوش کو بچاتے ہوئے وہ خود فائرنگ کی زد میں آگئی ۔ جس کے بعد اشفاق نے اپنی زندگی کا بھی خاتمہ کرلیا۔
دوسری جانب پولیس اورطبی عملے کا کہنا ہے کہ بظاہراشفاق کی موت خودکشی کا نتیجہ نہیں لگتی کیونکہ اشفاق کی موت دل میں گولی لگنے کے باعث ہوئی ہے، جس زاویے سے اشفاق کو گولی لگی ہے عام طور پر خودکشی میں اس طرح گولی نہیں لگتی۔ اشفاق کے پوسٹ مارٹم کی رپورٹ سے اس کی موت کا تعین کیا جاسکے گا۔
واضح رہے کہ 2 روز قبل بھی لاہورہی میں ماں نے پسند کی شادی کرنے پر اپنی بیٹی کو زندہ جلا دیا تھا۔
