راجن پور: کچہ آپریشن کی تحقیقاتی ٹیم نے کام شروع کردیا

چھوٹو گینگ کے خلاف بنائی گئی تحقیقاتی ٹیم نے گینگ کے سربراہ غلام رسول چھوٹو سمیت ہتھیار ڈالنے والے 13 افراد کے خلاف تحقیقات کا آغاز کرتے ہوئے انکے خلاف درج مقدمات کی تفصیل طلب کر لی ہیں جبکہ آپریشن کے دوران 6 پولیس جوانوں کی شہادت پر ڈی پی او راجن پور کے خلاف تحقیقات کا آغاز بھی کر دیا گیا ہے۔جوائنٹ انوسٹی گیشن ٹیم کی جانب سے چھوٹو گینگ کے سرغنہ غلام رسول عرف چھوٹو سمیت ہتھیار ڈالنے والے 13 افراد کے خلاف تحقیقات کا آغاز کر دیا گیا ہے۔ ان 13 افراد کے خلاف مجموعی طور پر 42 مقدمات درج ہیں۔ گینگ کے سربراہ چھوٹو کے خلاف ضلع رحیم یار خان کے مختلف تھانوں میں 13 مقدمات درج ہیں جن میں زیادہ تر قتل اور اغواء برائے تاوان کے ہیں۔دوسری جانب ذرائع کے مطابق کچہ آپریشن میں 6 پولیس جوانوں کی شہادت پر فرائض میں غفلت اور نااہلی کی بنیاد پر ڈی پی اور راجن پور کے خلاف بھی تحقیقات شروع کر دی گئی ہیں۔ غلام رسول عرف چھوٹو سے مختلف اداروں کی تفتیش جاری ہے اور ملنے والی معلومات کو خفیہ رکھا جا رہا ہے اور ان معلومات کی روشنی میں تحقیقات کا عمل جاری ہے۔