ملک بھرمیں یوم شہادت حضرت علیؓ انتہائی عقیدت و احترام سے منایا جارہا ہے

دہشت گردی کی کوشش کو ناکام بنانے کے لیے ملک بھر میں سیکیورٹی ہائی الرٹ ہے فوٹو:فائل

ملک بھر میں  یوم شہادت علی رضی اللہ تعالیٰ عنہہ انتہائی عقیدت و احترام سے منایا جارہا ہے جب کہ اس موقع پر ملک کے تمام چھوٹے بڑے شہروں میں ماتمی جلوس اپنے روایتی راستوں پر رواں دواں ہیں۔

یوم شہادت علی کے موقع پر ملک کے تمام چھوٹے بڑے شہروں میں ماتمی جلوسوں کا اہتمام کیا گیا ہے جو مقررہ راستوں سے ہوتے ہوئے اپنی اپنی منزل پر پہنچ کر اختتام پذیر ہوں گے، اس موقع پر سیکیورٹی کے انتہائی سخت انتظامات کئے گئے ہیں۔ کراچی میں حضرت علی رضی اللہ تعالی عنہ کے یوم شہادت پر مرکزی مجلس عزا نشتر پارک میں ہوئی جس کے بعد ماتمی جلوس برآمد ہوا جواس وقت اپنے روایتی راستوں سے ہوتا ہوا حسینیہ ایرانیاں کھارادر پر ختم ہوگا۔ یوم علی کے موقع پر کراچی سمیت سندھ کے مختلف اضلاع میں سیکیورٹی خدشات کے پیش نظر موٹر سائیکل کی ڈبل سواری پر 3 دن کے لیے پابندی عائد کردی گئی ہے۔ حیدرآباد میں مرکزی جلوس کربلا دادن شاہ سے نکالا جارہا ہے جو قدم گاہ مولا علی پہنچ کر ختم ہوگا۔

وفاقی دارالحکومت اسلام آباد میں ماتمی جلوس اپنی منزل کی جانب رواں دواں ہیں جب کہ لاہور سمیت پنجاب کے مختلف شہروں میں بھی یوم علیؓ کے سلسلے میں چھوٹے بڑے جلوس اپنی روایتی راستوں پر رواں دواں ہیں اور مقررہ راستوں سے ہوتے ہوئے اپنی منزل پراختتام پزیر ہوں گے، اس موقع پر سیکیورٹی کے بھی انتہائی سخت انتظامات کئے گئے ہیں، بلوچستان، خیبرپختونخوا،گلگت بلتستان سمیت آزادکشمیر میں بھی یوم علیؓ کے حوالے سے ماتمی جلوس برآمد ہورہے ہیں۔